По неодамнешната турнеја низ Азија, музичарот Владимир Василевски-Четкар се враќа во Њујорк каде што е неговата постојана адреса. Тој денеска ќе одржи концерт во светски познатиот њујоршки „Би Би Кинг блуз клуб“, каде настапуваат најзвучните имиња во светот на фанк, блуз и соул музиката.
Четкар ќе настапи на сцената Лусил, која е именувана по гитарата на блуз легендата Би Би Кинг. Ќе се претстави со авторска музика и ќе биде придружуван од Коди Роландс на труба, Алтасар Отесен на тенор саксофон, Сет Вивер на тромбон, Владан Мијатовиќ на клавијатури, Џејмс Квинлан на бас и Нолан Брд на тапани.
Македонскиот музичар неодамна настапи во Јужна Кореја на најпознатиот џез-фестивал Јарасум, кој е меѓу најголемите во светот. Фестивалот ја избра композицијата на Четкар „Heavenly“ за официјална музичка тема и направи музичко видео со најдобрите моменти од фестивалот.