Во полното фоаје во Центарот за култура „Марко Цепенков“ во Прилеп синоќа камерен концерт насловен „Амбасада на мајсторството“ изведоа две млади уметнички, музички виртуози, пијанистката Ана Грот и виолинистката Полина Борисова од Русија. Концертот е по повод 9 мај – Денот на победата. И двете веќе меѓународни лауреати, со својот прв концерт во Македонија ја воодушевија прилепската публика изведувајќи класични дела и разиграни танци.
Грот и Борисова велат музиката е нивниот живот, а првите впечатоци за Македонија, посебно за публиката се прекрасни.
– Музиката е мојот живот, мојата енергија. Преку неа ги изразувам емоциите. Живеам за музиката и сакам да и ја подарувам на публиката, вели Борисова.
Грот, пак, изјави дека и се допаѓа македонската публика, со внимание ги следи и е многу музикална.
– Музиката ми е се. Од најраното детство сум со неа и ќе остане со мене засекогаш, рече Грот.
Концертот е во организација на Руската амбасада во Македонија, на Санктпетербуршкиот дом на музиката и на руската државна агенција „Роса трудничество“, посочи претставникот на агенцијата Арем Романцев.
– Целта е да се промовира руската култура. Досега се организирани три настапи во Македонија, а два во Прилеп. На двете млади уметнички ова им е прва средба со приелпската и со македонската публика и големо искуство, вели Романцев.