Во Центарот за култура во Куманово „Трајко Прокопиев“ вечер во 20 часот концерт ќе одржи дуото кларинети Ѓоревски – Бакрески.
На програмата, соопштија надлежните од установата, ќе бидат изведени дела од Крузел, Пуланк, Илиевски, Лефевр, Росини, Огненовски.
Двајцата уметници Ристо Ѓоревски и Игор Бакревски го спојуваат музичкото искуство и знаење по долгогодишно музичко делување на полето на класичната музика, како на солистички план, така и во различни ансамбли и камерни формации.
– Ги повикувам сите љубители на сериозната музика да го проследат концертот на овој невообичаен дует на два кларинети. Ваков концерт во Куманово досега не сме имале, изјави Роберт Цветковски од кумановскиот Центар за култура.
Двајцата се вработени во оркестарот на Македонската опера и балет. Дуото Ѓоревски-Бакревски е формирано со цел да се истражува репертоарот за вакво камерно дуо, кој е ретко интерпретиран на концертните подиуми во Република Македонија.
Дуото ја презентира македонската музика и култура и пошироко надвор од границите на земјава. Нивните настапи на меѓународна сцена неодамна беа наградени на последниот Меѓународен натпревар на кој што настапија во Штањел, Словенија во 2015 година, каде освоија награда.