Млади уметници од Училиштето за цртање и сликање при Домот на културата „Јане Сандански“ од Ново Село денеска на јавноста ѝ ги покажаа своите 27 дела во ликовниот простор на Домот за деца и младинци „Благој Мучето“ во Струмица.
Според Светлана Мазгалоска-Вучетиќ од Домот за деца и младинци, оваа изложба е дел од долгодишната соработка меѓу двете културни институции.
-Секоја година ја преземаме изложбата на Училиштето од Ново Село и ја изложуваме во нашите простории, каде присуствуваат ученици од другите училишта, за да може да видат како децата од Ново Село работат на полето на ликовната дејност, рече Мазгалоска-Вучетиќ.
Во Училиштето за цртање и сликање при Домот на културата во Ново Село членуваат 15 ученици.
-Училиштето почнува со почетокот на школската година и трае до нејзиното завршување и во текот на целата година учениците ги учат техниките на цртање и сликање под раководство на професорот Ѕвонко Тилев, рече Никола Јанев од Домот на културата „Јане Сандански“ од Ново Село.
Проектот првпат е финансиран од Министерството за култура.