Во Изложбениот салон 2 на Центарот за култура „Бели мугри“ во кочани синоќа беше отворена изложбата под наслов „Живот во бои 2“ на авторката Андријана Мациев од Скопје.
На изложбата во Кочани која побуди голем интерес кај љубителите на ликовната уметност, се поставни 15 сликарски платна, дела во кои е прикажано ликовното доживување на бојата на авторот. Оваа изложба е дел од вториот циклус „Живот во бои 2“, каде авторката го прикажува своето ликовно истражување во бојата.
На отварањето на изложбата „Живо во бои 2“ пред присутните зборуваше Александра Димитрова, директор на Центарот за култура и истата ќе биде отворена до 20 септември 2017 година.
Андријана Мациев е родена на 16 септември 1980 во Скопје. Средно образование завршила во Училиштето за применета уметност „Лазар Личеноски“ во Скопје, а дипломирала на Факултетот за ликовни уметности, Одделот графика во класата на професорот Димитар Малиданов.
Таа е член е на Друштвото на ликовни уметници на Македонија и на Здружението „Широка стаза“ од Земун. Изложува самостојно и учествува на повеќе групни изложби, манифестации и ликовни колонии во Македонија и надвор од државата. Добитник е на повеќе награди.