Самостојната изложба „Панта реи (Panta rei)“ на Наташа Гелева вечерва ќе биде отворена во КСП Центар-Јадро.
Изложбата се состои од избор од 25 фотографии од истоимениот циклус и претставува еден вид омаж на Скопје.
-Оваа целина е и начин да се искористи природата на фотографскиот медиум, посебно урбаната фотографија за да се направи обид за зачувување на сеќавањата, наспроти хаотичниот тек на промените. Тие се документ којшто ни доловува само еден миг во сеопштиот тек на незапирливата промена, смета Владимир Јанчевски.
Наташа Гелева (1978) се занимава со фотографија од 1999 година. Учествувала на повеќе изложби, а последните неколку години има самостојни изложби „Излишно“ (ЦК „Григор Прличев“ – Охрид, 2022) и „Бев таму“ (Комитет, Скопје, 2021). Значајно е нејзиното учество на изложбата „Екстатични тела“ (Skopje Pride Weekend, МСУ-Скопје, 2022).
Освен со фотографија, Гелева се занимава и со видео и заедно со режисерот Јане Алтипармаков соработуваат на неколку проекти, меѓу кои документарниот видео-арт „И фабриките имаат душа“ направен под координација на продуцентот на филмовите на Стенли Кјубрик, Јан Харлан и на неколку музички спотови. Член е и на Иницијатива за Независен Културен Активизам (ИНКА), организатор на ДРИМON.