Изложба на слики на авторката Татјана Манева ќе биде отворена вечерва во изложбениот салон на Центарот за култура „Трајко Прокопиев“ во Куманово. Кумановци ќе имаат можност да проследат 16 дела во поголем формат кои авторката ги работела во периодот од 2017 до 2019 година.
Кумановци првпат ќе имаат можност да ги видат делата на Манева која досега реализирала бројни самостојни изложби во државата и странство, Германија, Црна Гора, САД, Кина, Холандија.
Манева магистрирала на Факултетот за ликовни уметности во Скопје на остек графика и е добитничка на бројни награди во државава и странство.
– Сликите на Татјана Манева се откривање-барање на исчезнатото тело, загубено во историјата, заслепено од блескавите и разнобојни светла на што самото се прождира и кое само себе се произведува од минијатурни клетки, матрици и мемории, од кое останало само клише, код, испразнета форма, некаква поза, декор, слика, пишува за сликите на Манева, Емил Алексиев.
Изложбата во Куманово ќе биде поставена до 8 ноември, годинава.