Во новиот галериски простор на Пионерскиот дом во Гевгелија со своја самостојна изложба насловена „Птици за ќерка ми“ се претстави ликовниот уметник Јорданчо Кицовски од Скопје.
Изложбата ја отвори ликовната уметница Мирјана Крстева Массети, која истакна дека се работи за интересен автор кој се претставува пред гевгеличани со дваесет дела работени во акрил на платно, создавани изминативе три години.
– Сликите ги насликав за мојата малечка ќерка на која и посакувам да порасне и да биде среќна и слободна како птица. Заради тоа на нив доминира птицата како симбол на слободата, мирот и спокојот, рече Кицовски.
Авторот завршил Факултет за ликовни уметности во Скопје. Досега учествувал на неколку ликовни колонии во земјава и има реализирано една самостојна изложба во Скопје и повеќе групни изложби во Северна Македонија и во САД.