По повод Меѓународниот ден на Франкофонијата вечер во Мала Станица ќе биде отворена изложба на фотографии „Поглед од прозорец“ на авторот Роберт Јанкулоски.
Изложбата ја организираат Македонскиот центар за фотографија и Националната галерија на Македонија.
Проектот „Поглед од прозорец“ е реализиран во 2012 година во Париз, а е инспириран од истоимената фотографина на еден од пронаоѓачите на фотографијата и на фотографскиот медиум, францускиот фотограф Жозеф Нисефор Ниепс. Станува збор за првата регистрирана фотографија направена како поглед од еден прозорец, со глетка на приградска панорама.
Роберт Јанкулоски е роден во Прилеп, 1969 година. Дипломирал на Факултетот за драмски уметности во Скопје, отсек Филмска и ТВ Камера во 1997 година. Магистрирал на Универзитетот за аудиовизуелни уметности ЕСРА во 2011 година. Основач е и директор на Македонски центар за фотографија. Има одржано 26 самостојни изложби и учествувал на голем број групни изложби. Добитник е на неколку награди од областа на фотографијата и филмската камера.