Во Центарот за култура во Крива Паланка изложени се дела од учесниците на работилници за квилинг-техника. Претставени се педесетина дела од 15 деца од основните училишта „Јоаким Крчовски“ и „Илинден“ кои во изминатиот месец работеа и ја учеа техниката квилинг позната како филигран на хартија.
Од кривопалаенчкиот Центар за култура информираат дека активностите се дел од годишната програма, а се реализираат во соработка со уметницата Фросина Стојчевска, која во библиотеката на Центарот ги подучуваше учесниците за квилинг-техника.
– Голем успех е да го работиш она што го сакаш и целосно се пронаоѓаш себеси. Тогаш ќе се надополнуваш секогаш и со секоја следна изработка ќе бидеш чекор поблиску до усовршување. Уште поголем успех е несебично да го поделиш знаењето. Ако дозволите да ве води креативноста, резултатите на крајот ке бидат ненадминливи, посочи Стојчевска.
Изложбата е отворена за посетители, а утревечер во Центарот за култура во Крива Паланка ќе биде отворена и завршна изложба на членовите на ликовното студио кое работи во негов состав.