Изложбата „Град“ од Атанас Ботев ќе биде отворена утре во 19.40 часот во ликовниот салон на ЦК „Марко Цепенков“ во рамките на МТФ „Војдан Чернодрински“.
– Во 2012 година бев сведок на процесот на рушење на пероните на Старата железничка станица – една од велелепните железнички станици на Балканот (на нивно место се планира изградба на трговски комплекс) па решив да ги фотографирам остатоците од бетон и челик кои успеаја да го издржат земјотресот од 1963, но не и човечката глупост во 2012 година. Врз основа на фотографиите направив серија цртежи кои што се сведоштво на едно агресивно узурпирање во урбаната структура на градот и протест против девастацијата на јавниот простор – вели Ботев
Роден е во Скопје во 1973 година. Дипломира на Факултетот за ликовни уметности во Скопје (графика и графички дизајн) во 1997. Магистрира на истиот факултет во 1999. Работи како раководител на Отвореното графичко студио при Музеј на град Скопје.
Работи во повеќе медиуми: сликарство, графика, цртеж, инсталација, перформанс.
Досега има остварено 12 самостојни изложби во Скопје, Њујорк, Нирнберг, Цетиње и Берлин а има учествувано на бројни групни изложби во земјава и во странство