Во изложбениот салон на НУ Центар за култура „Трајко Прокопиев“ – Куманово, вечерва со почеток во 20 часот ќе биде отворена изложбата на акварели на академикот Васко Ташковски. Кумановската публика ќе има можност да разгледа 40-тина акварели кои академикот ги работел во подолг временски период од 1991-2018.
– Кумановската публика ќе има можност да разгледа 38 акварели. Ги поканувам заинтересираните да ја проследат изложбата, вели директорот на кумановскиот Центар за култура, Роберт Цветковски.
Васко Ташковски е роден 1937 година во село Нижополе, Битола. Средно уметничко училиште завршува во Скопје 1958, а дипломирал на Академијата за применета уметност во Белград 1964 година. Покрај сликањето во маслена техника работи и акварел, повремено работи и графички дизајн. Досега реализирал 52 самостојни изложби, а учествувал и на повеќе групни изложби во земјата и во странство. Добитник е на 18 награди и признанија. За неговото творештво снимени се осум телевизиски филмови.