Познатиот италијански диригент маестро Алесандро д‘Агостини ќе диригира со битолскиот камерен оркестар на претстојниот концерт во новата сезона.
Од НУ Центар за култура-Битола информираат дека под диригентската палка на д‘Агостини кон крајот на месецов ќе се одржи целовечерен концерт на кој ќе бидат изведени дела од Бах, Шопен и други светски познати композитори.
– Како што е познато камерниот оркестар на Битола годинава функционира во партнерство со нашата национална установа и со поддршка на Министерството за култура и општина Битола. Новата есенска музичка сезона ќе продолжи на 26 октомври со целовечерен концерт за клавир и оркестар, и ќе биде под диригентската палка на маестро Алесандро д‘Агостини, диригент од Италија кој има импозантна кариера со познати оперски куќи низ матичната и други европски држави, потврди Борче Димитровски, директор на НУ Центар за култура-Битола.
На концертот на камерниот оркестар на Битола, солисти ќе бидат Марија Вршкова-уметнички соработник на Факултетот за музичка уметност во Скопје, Марија Ѓошевска-професор на истиот факултет и Татјана Божиновска, професорка по пијано во државното Музичко училиште во Битола.
Од НУ Центар за култура-Битола информираат дека во ноември камерниот оркестар ќе ја изведе рок-симфонијата чија премиера беше на „БитФест“, а кон крајот на годината и традиционалниот новогодишен концерт со што продолжува континуираната програма на камерниот оркестар на Битола.