На малата сцена во Македонски народен театар, на 17 јуни, со почеток во 20 часот, со претставата „Со љубовта шегување нема“, подготвена по текстови од Алфред де Мисе и документирани материјали, а во режија на Софија Ристевска, ќе настапи „Интимен театар“ од Битола.
Во претставата „Со љубовта шегување нема“ играат Здравко Стојмиров, Катерина Аневска и Стефанија Милевска. Кореографи се Кире Миладиноски и Стефанија Милевска, додека костимите ги подготви модното студио „Анастасија“. Дизајнот на звук и изборот на музика се на Златко Кузевски, а дизајнер на светлото е Игор Мицевски.
„Со љубовта шегување нема“ е создадена врз идејата за денешниот неолиберализам, којшто го проголтува и уништува секој човечки напор за живеење надвор од матрицата на истиот. Во денешниот свет, конструиран само и единствено врз правилата на Капиталот, човекот, за жал, нема алтернатива, освен да се потчини и да се постави во функција на парите.
Кога капиталот е основниот параметар по којшто се конструира и структурира еден живот, тогаш доаѓаме до заклучокот дека, всушност, „со капиталот шегување нема“, а дека „љубовта е постудена од капиталот“. Точно за тоа зборува претставата. Денес може да се шегуваш со љубовта, но не и со капиталот. Не со финансиите на големите корпорации затоа што најприфатливата особина на современиот човек е неговата потрошувачка и финансиска моќ. Љубовта е во заден план затоа што навлегува во концептот на капиталистичко-политичките односи што во моментов владеат во светот.
Во општество на несолидарност и краен финансиски егоизам, нема место за љубов. Во нашата претстава, ги спротивставуваме љубовта и капиталот, ги ставаме во арена и ги анализираме резултатите од тој чин. Во свет на потрошувачко општество, љубовта којашто некогаш била основната жива и движечка сила за човекот, денес е константно поставувана на испит и секојдневно и масовно манипулирана.
„Со љубовта шегување нема“ е повик за создавање на еден похуман, посолидарен и социјално рамноправен свет, каде што индивидуата ќе има право на слобода и љубов, затоа што точно игнорирањето на овие две категории може да нè чини многу!“, пишува во текстот што ја најавува оваа претстава.