Со ретроспективна изложба на делата создавани во изминатиот половина век отворена во Центарот за култура „Антон Панов“ во Струмица почна со работа јубилејното 50-то издание на меѓународната ликовна колонија.
На свеченото отворање присуствуваше и Зоран Заев градоначалник на општина Струмица која е и покровител на колонијата.
Струмичката ликовна колонија е со најдолга традиција меѓу колониите во Македонија во чија работа учествувале околу илјада ликовни уметници од сите меридијани во светот кои во трајно наследство на колонијата оставиле над две илјади дела работени во сите ликовни техники.
Во годинашното јубилејно издание нови дела ќе создаваат дваесетина ликовни уметници од Македонија и повеќе странски држави, а нивните дела ќе бидат презентирани на традиционалната изложба која ќе биде отворена на 11 септември, денот на ослободувањето на Струмица.