Вчера и денеска во МКЦ, уметници и теоретичари од Грција, Албанија, Косово, Србија и од Македонија, на настанот насловен „Автономија/Ослободување“ во организација на Институтот за општествени и хуманистички науки – Скопје говорат за проблемите и темите на регионална теорија, активизам и практики.
„Автономија/Ослободување“ (Autonomy/Liberation) е првиот настан од проектот за регионална соработка „NATIONLESS“, заеднички труд на Институтот за општествени и хуманистички науки – Скопје, ДАМ-ДАШ/Шкарт – Белград и Универзитетот на Македонија – Солун – Оддел за балкански, славистички и ориентални студии.
На дискусијата вчера Артан Садику од движењето Солидарност говореше за национализмот кој е дел од системите на земјите на регионот и го наведе примерот со Македонија.
– Кога туристите доаѓаат во Македонија ги дочекуваат натписи на кои пишува: „Добро дојдовте во Македонија, колевката на цивилизациите“. Именувањето на автопатот и на скопскиот аеродром „Александар Македонски“, сите споменици и статуи одеа во насока на јакнење на нацинализмот, Александар, но исто така беше и во Грција каде до деведесеттите години, јунаци од античката историја биле филозофите како Платон или Аристотел, но во овој период наеднаш најголем херој од антиката стана Александар Македонски, рече Садику.
Тој рече дека затоа во „Солидарност“ креираат различно мнозинство од етничките мнозинства.
– Не се нарекуваме мултиетничка организација, туку надетничка оргнизација, рече Садику.
Професорката Фотини Цибириду од Универзитетот на Македонија во Солун, говореше за траумата на емргрантите, со кои се соочуваат во Грција.
Таа говореше з а поимот „срамот на малцинството“ и траумата на доселениците да станат грчки државјани да ја прифатат културата. Таа говореше како од националното настанува грчкиот национализам.
– А и поимот мултикултурализам е проблематичен затоа што повеќе исклучува, отколку што вклучува, рече Цибриду.
Слободан Караманиќ од Белград рече дека концептот на национализмот не е постар од 200 години.
– Неговото враќање денес го гледам како процес на реструктуирање, недостиг на идеја за днината. Овие бесмислени споменици што ги видов тука во Скопје, сиот овој нонсенс, служи само да се пополни празнината, недостигот на идеја за насока за иднината, рече тој.
Во галеријата на МКЦ беше отворена и изложбата „Nationless: борбата продолжува“, на која учествуваа уметници од Србија, Грција, Албанија, Косово и Македонија: Олсон Ламај [АЛ], Јорданис Стилидис [ГР], Марија Сари [ГР], Драган Протиќ-шкарт [СРБ], Велимир Жерновски [МК], Бранко Тешевиќ – STREET HERO [СРБ], Висар Арифај– Силна партија [КС], Нада Прља и Бранко Прља [МК], Ангелики Авгитиду [ГР], Милош Милетиќ и Мирјана Радовановиќ- КУРС (СРБ), Јане Чаловски и Наја Франгули [МК/ГР], Филип Јовановски [МК] и Ѓорѓе Јовановиќ [МК].
Целта на овој проект наслвен Nationless е проблематизирањето на национал(ните)истичките идентитетски политики што се „инклузивни” за едните, а секогаш „ексклузивни” за другите и ја парализираат сета политика што ја разобличува светоста на етничкиот принцип на општествена мобилизација.
А.Б.