Во галеријата Даут-пашин амам вечер во 19.30 часот ќе биде врачена наградата „Прозарт“ на српската писателка и режисерка Вида Огњеновиќ, која е лауреат на третиот книжевен фестивал Про-ЗА Балкан.
Писателите кои учествуваат на фестивалот ќе читаат извадоци од своите дела на настанот со кој ќе заврши годинашниот „Про-За Балкан“ организиран од издавачката куќа „Икона“.
Во рамки на „Про-За Балкан“ вчеравечер беше одржана тркалезна маса на тема „Литература, граници, публика“.
Учествуваа Урсула Бергентал од Германија, главен и одговорен уредник во „бтб Рандом хаус”, Силвија Брунели, сопственик на „Набу” – литературната агенција од Италија, писателката од Хрватска Алида Бремер, Вида Огњеновиќ од Србија, Полона Главан од Словенија, гостите од Турција – Мехмет Дермиташ, директор на Интернационалниот литературен фестивал „Танпинар” и Нермин Молаоглу, литературен агент на „Калем агенција”, како и македонските писатели Ермис Лафазановски, Александар Прокопиев и Димитар Башевски.