Македонскиот џез-музичар Владимир Четкар денеска ќе учествува на Блу ноут џез-фестивал (Blue Note Jazz Festival) во Њујорк, на кој носечко име е Арета Френклин, меѓу најпознатите женски вокали на сите времиња.
На престижниот фестивал ќе учествуваат џез, соул и поп-ѕвезди како Боби Мекферин, Мајкл Болтон, Хозе Џејмс, Данило Перез, Џо Ловано, Мишел Камило, Џон Патитучи…
Фестивалот се одржува на повеќе локации низ Менхетен и ќе трае до крајот на јуни. Четкар ќе се претстави во септет на сцената на Блу ноут џез клубот, веднаш по концертот на триото на џез-великаните Данило Перез, Џон Патитучи и Брајан Блејд.
Ќе биде придружуван од музичарите Арон Хенри, Коди Роулендс, Кори Волис, Милан Милановиќ, Мото Фукушима и Џефри Фахардо. Тоа ќе биде втор настап на Четкар на овај фестивал и негов шести настап во Блу ноут.