Во галеријата на Домот на култура „Илинден“ во Општина Илинден отворена е изложба на академскиот сликар Новица Трајковски, насловена „Сликарот со пријателите“.
Претставени се 40-ина портрети кои во подолг период Трајковски им ги направил на своите пријатели. На отворањето на изожбата тој рече дека ова е негова прва изложба на портрети по 30 години.
На отворањето беа присутни и голем број јавни личности кои се портретирани од сликарот, како Раде Силјан, Ефтим Клетников, Летиф Јанчигвин – Ли, Јаков Дренковски, Климе Коробар, Павле Кузмановски, Виолета Ачкоска…
Изложбата ја отвори градоначалникот на Илинден, Жика Стојановски. Тој му се заблагодари на Трајковски кој живее и работи во Илинден, за неговиот голем придонес во развојот на културата и културните вредности во општината.
Изложбата ќе биде отворена до крајот на јануари идната година.