Со изложба на фотографии за биографијата на првиот претседател на Президиумот на АСНОМ Методија Андонов Ченто националните установи Музеј на тетовскиот крај и Завод и музеј од Прилеп се вклучија во свеченостите по повод 19 ноември – Денот на ослободувањето на Тетово во Втората светска војна. Изложбата од авторот Рубинчо Белчески е насловена како “Ченто – Биографија низ фотографии“ а е поставена во спомен куќата на народниот херој Ѓоце Стојчески Амбарче што сега се користи од Музејот на тетовскиот крај.
-Изложбата е составена 250 хронолошки подредени фотографии од кои дел првпат се претставени пред јавноста во Македонија. Таа е резултат на шестгодишна истражувачка работа во која голема помош добив од семејството на Ченто од каде се и најголем дел од сликите. Планирам најголем дел од оваа изложба заедно со хронологија на настани и текстуален дел да прерасне и да се издаде како фото-монографија, изјави Белчески.
За него Методија Андонов Ченто претставува борец и визионер кој целиот свој живот се борел за слободата и независноста на Македонија.
-Ченто голем дел од својот живот поминал во затвор како во кралска Југославија така и за време на окупацијата во Втората светска војна, но за жал и во слободна Македонија. Преку оваа изложба можеме да го прикажеме освен неговиот живот и историјата на Македонија, бидејќи Ченто е роден во 1902 година во предвечерието на Илинденското востание па преку неговото детство и младост за време на Балканските и Првата светска војна до животот и работата меѓу двете светски војни и Втората светска војна и по неа, односно најтурбулентните настани за Македонија и нејзиното формирање како држава низ сите периоди и искушенија рече Белчески.
Тетово е меѓу десетте градови во Македонија каде досега била поставена изложбата “Ченто – Биографија низ фотографии“, а според Белчески, тоа ќе биде направено и низ останатите делови од државата.