САД по средбата на претседателот на Србија Томислав Николиќ со претседателката на Косово Атифет Јахјага соопштија дека силно го поддржуваат продолжувањето на дијалогот за нормализирање на односите и надминување на разликите, што ќе овозможи Белград и Приштина да продолжат на својот европски пат.
Претставник од Стејт департментот, изјави за Танјуг, дека Вашингтон и честита на високиот претставник на ЕУ за надворешна политика и безбедност Кетрин Ештон што ги седна Николиќ и Јахјага на заеднички состанок во рамките на дијалогот под покровителство на ЕУ.
– Ние ќе продолжиме да бидеме целосно вклучени, заедно со владите од ЕУ и Унијата во целина, за поддршка на овие напори, нагласи претставникот на американската администрација.
Српскиот претседател Николиќ изјави вчера дека средбата со Јахјага е отворена „книга за договор“, но дека во случај на дополнително инсистирање на признавање на Косово, дијалогот меѓу Белград и Приштина не може да оди во добар правец, ниту да донесе заедничко решение.