Поранешниот советски лидер Михаил Горбачов, кој во 1987 година заедно со тогашниот американскиот претседател Роналд Реган, го потпишаа Договорот за уништување и забрана на производство на проектили со кус и среден дострел (ИНФ), ја оквалификува како „грешка“ најавата на САД за повлекување од тој Договор.
Горбачов смета дека „под никакви околности не треба да се раскинуваат старите договори за разоружување”.
– Дали тие во Вашингтон навистина не сфаќаат каде би можело ова да доведе? Напуштањето на Договорот за нуклеарни проектили од среден дострел е грешка, потенцира Горбачов.
Американскиот претседател Доналд Трамп синоќа соопшти дека САД ќе се повлечат од Договорот за уништување и забрана на производство на проектили со кус и среден дострел, затоа што, како што рече, Москва ја прекршува спогодбата.
Договорот е склучен во 1987 година меѓу САД и тогашниот Советски Сојуз, чиј правен наследник е Русија. Договорот го потпишаа тогашниот американски претседател Роналд Реган и последниот советски лидер Михаел Горбачов. Со него се предвидува забрана за производство, тестирање и распоредување на нуклеарни и конвенционални ракети со дострел од 500 до 5.500 километри што се лансираат од земја.