Италија ги затвора своите аеродроми за авиони што без дозвола ќе носат мигранти од Германија. Тоа го нагласи денеска италијанскиот министер за внатрешни работи Матео Салвини.
Со изјавата само дополнително се влоши спорот меѓу Италија и ЕУ за поделба на одговорноста за барателите на азил.
Весникот Република објави дека германската Агенција за бегалци испратила десетици писма до мигрантите со совети да се вратат во Италија со чартер летови.
Првиот таков трансфер е планиран за 9 октомври.
– Ако некој во Берлин или во Брисел планира да ни испрати десетици мигранти со неовластени чартер летови, тој мора да биде свесен дека нема да има аеродром што ќе биде на располагање, рече Салвини.
-Ние ги затвораме аеродромите исто како што веќе ги затворивме пристаништата, рече тој.
Официјални лица на аеродромот во Минхен изјавија дека баварските власти ја планираат првата депортација во Италија на мигранти кои пристигнале на германската граница, но првично се регистрирани во Италија.