Во последните денови пред најзначајната одлука во историјата на независна Македонија, Христијан Мицкоски се обидува да ја напаѓа македонската иднина. Во вчерашното обраќање, Мицкоски се обиде да ги оспори сите важни случувања од поновата историја кои на Македонија и донесоа мир и стабилност, рече Костадин Костадинов од СДСМ.
Тој запраша дали Мицкоски смета оти во турбулентните деведесетти Македонија не требаше да влезе во ООН, или пак дали не требаше да се склучи Рамковниот договор во 2001 за да запре воениот конфликт.
– Настапот на Мицкоски покажува дека тој има проблем со подобрата иднина и перспективите што се отвораат пред граѓаните на Македонија. Зошто Мицкоски не сака Македонија да оди напред и зошто работи против македонската иднина? Никаде досега не е познато, лидер на политичка партија да нема став за најважното прашање за иднината. Никаде не се видело лидер на најголема опозициска партија да не сака да ја види својата земја напред во подобра иднина. Очигледно е, Мицкоски не сака Македонија да успее. Мицкоски може да биде уште порадикален, може да фрла со дрва и камења кон македонската иднина, но за среќа Мицкоски не е тој кој одлучува, рече Костадинов.
Тој кажа дека одлучуваат граѓаните, чие мнозинство е силно определено за иднина во ЕУ и НАТО.
– Одлучуваат граѓаните кои ќе излезат и ќе гласаат на 30 септември. Одлуката ја носи огромното мнозинство кое ќе каже ЗА европска Македонија. Мицкоски очигледно останува изолиран на браникот на криминалите, рече Костадинов.