Заштита на децата од насилство и за унапредување на социјалната инклузија на децата со попреченост ќе бидат тема на дводневниот регионален состанок на претставници од Албанија, Босна и Херцеговина, Црна Гора, Србија, Турција, Косово и Македонија што денеска и утре ќе се одржи во Скопје.
За време на средбата, учесниците од седумте земји ќе разговараат за напредокот постигнат во рамките на регионалната акција, ќе ги споделат поуките и иницијативите што имаат потенцијал да станат модели за репликација, ќе ги идентификуваат останатите заеднички предизвици на земјите-учеснички, како и стратегиите за нивно решавање по завршување на акцијата.
Регионалната средба треба да ја отворат Мила Царовска, министерка за труд и социјална политика, Џеновева Руиз Калавера, директор за Западен Балкан во Генералниот директорат за соседска политика и преговори за проширување во ЕК и Бенџамин Перкс, претставник на УНИЦЕФ во Скопје.
Во изминативе три години, седумте земји работат на јакнење на граѓанскиот сектор за подобро следење на реализацијата на детските права, промовирање на сеопфатни и иновативни услуги и зголемување на јавната поддршка за заштита на децата од насилство и за социјална инклузија на децата со попреченост.
Во напорите за борба против насилството врз децата и за унапредување на социјалната инклузија на децата со попреченост, УНИЦЕФ во Европа и Централна Азија и Европската комисија се партнери во соработката на тригодишна програма со наслов „Заштита на децата од насилство и унапредување на социјалната инклузија за децата со попреченост на Западен Балкан и во Турција“.
Повеќето земји-учеснички направија прогресивен чекор кон заштита на сите деца од различни форми на насилство преку зајакнување на правните рамки и воведување практични механизми за спроведување на овие закони со помош на национални планови за акција и координација на национално ниво.