Ракометарките на македонскиот шампион Металург се пред елиминација во осминафиналето од Купот на куповите откако на вчерашниот дуел против Турингер загубија убедливо со 29:11 (17:6). Реванш натпреварот се игра денеска со почеток во 15 часот, а и на овој дуел екипата од Германија е домаќин.
На првиот натпревар само четири ракометраки на Металург постигнаа гол, а најефикасна беше Мирјета Бајрамовска со 6 погодоци.
Од другите македонски екипи, вчеравечер Вардар СЦБТ пред своите навивачи го совалда рускиот тим Кубан со 30:28 и со два гола позитива ќе патува на реваншот во Краснодар. „Црвено-црните“ настапуваат во ЕХФ купот.
Третата екипа во женските ракометни еврокупови која игра во осминафиналето е Куманово, но и кумановчанки двата дуела ќе ги играат на теренот на противникот – Зрински од Мостар. Натпреварите ќе се одиграат на 9 и на 10 февруари.