Министерот за здравство Никола Тодоров ја почна својата посета на САД со средби на универзитетот Колумбија во Њујорк. Како што информираат од неговиот кабинет, целта е да се разгледаат можностите за испраќање на македонски лекари специјалисти на обука во овој престижен универзитет.
Министерството за здравство и Медицинскиот факултет во Скопје веќе имаат развиено соработка со Колумбија, каде предава и професорот со македонско потекло Горазд Росоклија.
Целта на посетата е оваа соработка да се прошири и да се забрза испраќањето на македонски лекари во САД. Од Министерството за здравство најавуваат дека проектот за полесно испраќање на македонските лекари на обука во САД е еден од највисоките приоритети на министерството.
По Њујорк, предвидено е министерот Тодоров да ги посети и Детроит, Хјустон, Вашингтон, Сиетл и Лос Анџелес. Целта на овие посети е утврдување или потпишување на меморандуми за соработка со универзитетски болници, со што ќе се овозможи престој и обука на македонски лекари.
Министерот Тодоров во Вашингтон ќе присуствува и на молитвениот појадок, кој се одржува на 7 февруари.