Шпаркасе Банка и Штаермеркише Шпаркасе во соработка со Универзитетот во Грац годинава ја продолжуваат програмата „Најдобрите од Југоистокот“ за доделување едногодишни стипендии за усовршување и стажирање на студенти и дипломирани лица од областа на економијата и правните науки од Македонија, Словенија, Хрватска, Босна и Херцеговина, Србија и Црна Гора.
Во Македонија програмата се реализира во соработка на Шпаркасе Банка Македонија, Економскиот факултет при универзитетот „Св. Кирил и Методи‘‘, а од годинава и Правниот факултет „Јустинијан Први‘‘.
Рокот за доставување на апликациите е 8 март, а право на учество во финалниот избор во Грац имаат тројца победници од секоја од земјите учеснички кои се бираат врз основа на воспоставени критериуми и ќе бидат познати во април годинава. Од сите нив во мај ќе бидат избрани 10-те победници кои ќе добијат стипендии. На тројцата финалисти од Македонија ќе им се доделат дополнителни награди од страна на Банката.
Целта на програмата е да се унапреди образованието, меѓународно искуство и пред сè влезот во професионалниот свет на студентите и дипломираните кадри.