Јавното претпријатие хидросистем „Стрежево“ ја заврши санацијата на т.н. зафат „Г-0“, каде е лоциран главниот канал за вода и преку кој е поврзан цевковод што испорачува вода за рударско-енергетскиот комбинат РЕК Битола.
Од ЈП „Стрежево“-Битола информираат дека санацијата се одвивала подолг период поради сложеноста на зафатот и теренот каде се наоѓа главниот канал за вода.
– Како менаџерски тим си поставивме задача санацијата да ја завршиме во август и успеавме во тоа. По една година санирано е свлечиштето над село Драгарино, поврзана е новата зафатна градба на главниот доводен канал и поврзан е цевководот за РЕК Битола. Со завршувањето на овој процес сега непречено и со максимален проток се испорачува технолошка вода до сите наши водокорисници, посочи Методија Граматковски, генерален директор на ЈП „Стрежево“-Битола.
Големото свлечиште кај селото Драгарино се појави во 2015 година и тогаш предизвика големи оштетувања на главниот водоводен канал од кој со технолошка вода се снабдуваат РЕК Битола и индустриската зона на Битола, а со завршувањето на санацијата отстранети се опасностите за нов прекин во водоснабдувањето кое го врши ЈП „Стрежево“-Битола.
