Денеска, на овој голем ден од македонската историја оддаваме почит на нашето славно, херојско минато. Денеска, оддаваме почит на нашите претци од Илинденското востание и од заседанието на АСНОМ, кои ги поведоа граѓаните кон слобода, независност и единство и ги поставија темелите на современата, независна и суверена Република Македонија, рече генералниот секретар на ВМРО-ДПМНЕ, Александар Кирацовски во честитката за Илинден.
„Идеалите за слободна, демократска и заедничка Македонија живеат и денес. Како одговорна и државотворна партија, заедно со вас граѓаните, го продолжуваме патот зацртан со Илинденското востание и заседанието на АСНОМ. Заедно со вас продолжуваме да ја градиме Македонија како слободна, демократска земја – пријател на регионот и светот. Горди на минатото, со одлучност тргнуваме кон иднината – Македонија да биде почитувана држава, полноправна членка на ЕУ и НАТО, онаму кадешто вредносно и цивилизациски припаѓа. Нека ни е честит и вековит втори август – Денот на Републиката“ честита Кирацовски.