Од почетокот на септември до крајот на декември десетте „туристички јазли“ од Македонија и Бугарија од мрежата „Прекуграничен забавен центар“ ќе им понудат на своите гости специјални викенди со кулинарски искушенија, информираа денеска од Еколошкото друштво „Планетум“ од Струмица.
Во рамки на два дена, домаќините од мрежата ќе ги запознаваат посетителите со конкретни локални продукти, начините на нивно користење и искористување, нивната историја и значењето за локалната заедница.
Гостите ќе имаат можност да ги пробат продуктите, да го набљудуваат подготвувањето на интересни локални рецепти со тие продукти, како и самите да научат да приготвуваат различни предизвикувачки рецепти.
Секоја од мини-дестинациите во пограничниот регион меѓу Република Македонија и Република Бугарија ќе претстави сопствен продукт, а гостите ќе можат да користат кулинарски викенди во Банско, Струма, Благоевград, Гоце Делчев и Петрич во Бугарија и во Гевгелија, Радовиш, Ново Село, Струмица и Дојран во Македонија и притоа ќе можат да пробат шумски плодови, грозје, мед, модар патлиџан, жито, кикиритки, кромид, пиперки, костен и смокви.