Градоначалникот на Неготино, Тони Делков денеска го прими во својот кабинет младиот и талентиран каратист Алек Ѓорѓиев, кој на последниот меѓународен натпревар во традиционално карате во Грција, постигна одлучни резултати во исклучително силна конуренција. Во категоријата „борби“ освои златен, а во категоријата „кати“ сребрен медал.
– Младиот надежен каратист беше во придружба на својот родител Ристе и тренерот на карате клубот „Антигона 2“ од Неготино, Ристо Сакалиев. Тие го информираа градоначалникот за условите во кои работи клубот кој постои од 1993 година, за остварените резултати на натпреварувањата на кои учествуваат, како и плановите за иднина, со посебен акцент на учеството на престојното Европско првенство во традиционално карате, што ќе се одржи во Белград, изјави портпаролот во неготинската локална самоуправа, Методи Митрев.
Градоначалникот истакнал дека во рамките на расположливите финансиски можности на општина Неготино, ќе бидат помогнати активностите на неготинските каратисти.
– Делков потенцираше дека за наредната година се планира поголема ставка во општинскиот буџет за финансирање на спортот и спортските активности, а ќе биде донесен и правилник за наградување на спортистите од општината кои ќе освојуваат први, втори и трети места на државни и меѓународни натпреварувања, додаде Митрев.