Женското бебе кое синоќа околу 2 часот по полноќ било оставено од непознато лице или непознати лица пред вратите на ЈУ Дом за доенчиња и мали деца во Битола, од денеска е згрижено во таа установа, а надлежните органи вршат истрага.
Директорката на ЈУ Дом за доенчиња и мали деца-Битола, Соња Илијовска, истакна дека по пријавата на настанот веднаш биле известени СВР-Битола и Центар за социјални работи-Битола, а на бебето му била укажана здравствена помош и детален здравствен преглед на Одделението за неонатологија во Клиничка болница-Битола.
– Женското бебе е здраво, згрижено и со максимална нега. Тоа е нашата основна дејност и задача, додека пак останатите служби и институции ќе постапуваат согласно надлежност, изјави кусо Илијовска.
Новороденчето веднаш по приемот е однесено во ЈЗУ Клиничка болница-Битола на детален преглед, при што е констатирана добра општа здравствена состојба, информираат денеска од МТСП.
Министерството за труд и социјална политика ги презема сите мерки во насока на заштита на новороденчето и обезбедување на соодветна грижа.
За останати информации во однос на истрагата и постапката, од МТСП упатуваат на Министерството за внатрешни работи.