Косовската претседателка Атифете Јахјага и нејзиниот српски колега, Томислав Николиќ, на почетокот на февруари ќе ги почнат разговорите за тоа што ќе значи финален резултат меѓу Косово и Србија, на кој треба да се најдат потписите на шефовите на двете држави, јави приштинска „Коха диторе“.
Доверливи извори за весникот изјавиле дека кабинетот на високиот претставнк на Европската унија за надворешна политика и безбедност Кетрин Ештон го предложила шестти февруари за датум на кој ќе се одржи средбата на двајцата државници и оти само чека официјална потврда од двете страни.
Во Брисел Јахјага и Николиќ, според дипломатски извори се очекува да искажат политичка поддршка за дијалогот меѓу премиерите, како и определбата за нормализирање на односите, јави дописникот на МИА.
Со договорот, за кој дипломатите се надеваат дека ќе се постигне оваа пролет, треба да бидат опфатени сите досега постигнати договори, а ќе биде искажана и определбата за мир, пишува „Коха диторе“.