Од следната учебна година во Средното општинско училиште „Ванчо Прке“ од Виница повторно ќе се одржува настава во прехранбената струка. Со објавениот конкурс за запишување нови средношколци, предвидено е да се оформи една паралелка со 34 ученици.
Хемиско-технолошката насока во виничката гимназија беше во мирување повеќе години, но сега се активира поради зголемените потреби на стопанството од соодветен кадар.
-Нашето училиште ја прифати иницијативата од компанијата „Макпрогрес“ за школување на одреден број ученици кои по завршувањето на средното образование би можеле да се вработат, а дел да продолжат да се дообразуваат во оваа струка. Потпишавме договор за соработка со кој дел од практичната настава ќе се одвива во погоните на компанијата, а таа ќе помага и за се друго што е поврзано со едуцирањето на учениците, истакна Тихомир Тасев, директор на СОУ „Ванчо Прке“ – Виница.
Солиден интерес за запишување во новата паралелка покажале учениците од Виница, Кочани и соседните општини, но за стекнување диплома од звањето прехранбен техничар се уште има слободни места.
За реализирање на наставата во прехранбената струка гимназијата од Виница располага со соодветни просторни услови и наставен кадар, пред се технолози, а ќе го користи и искуството на инженерите од стопанството.