Со изведување градежни работи, започна уредувањето на јавна површина во централното подрачје на неготинското село Пепелиште, непосредно до споменикот на паднатите борци во НОБ.
– Се работи за изведба на влезна патека до одморалиштето и пристапна патека до песочник, каде ќе биде поставена урбана опрема за потребите на населението, информираше Тони Делков, градоначалник на Неготино.
Градежните работи опфаќаат одбележување на локацијата за градење со соодветна сигнализација, машински ископ на земја, подготовка и набивање на тлото, по што следува набавка, насипување и планирање на тампон по целата градежна површина на просторот, кој е предмет на уредување.
Делков соопшти дека во натамошниот дел од работите ќе се пристапи кон монтажа на бекатон плочки на целиот простор под патеките и одморалиштето околу споменикот, како и монтажа на парковски рабници по целата површина на градење.
– По завршувањето на работите, жителите на Пепелиште на располагање ќе добијат пријатно катче за одмор, релаксација и поминување на дел од слободното време, а проектот се реализира со средства од буџетот на општина Неготино, наведе Делков.