Членовите и поддржувачите на ВМРО-ДПМНЕ од дијаспората покажале слаб интерес за закажаните средби со претседателот на партијата Христијан Мицкоски во повеќе градови во Италија. Според извори на А1он поради незаинтересираноста средбите биле одложени, а се одржала само една во градот Канели каде што дошле луѓе и од други места кои биле на списокот за посета. Претседателот на партијата имал закажано средби со поддржувачи на ВМРО-ДПМНЕ во Пјаченца, Тренто, Болцано, Конилијано, но наместо тоа, средба се случила само во Канели, по што стигна драматичното соопштение дека Мицкоски се враќа и бара итна лидерска средба за името.
Од партијата велат дека причината поради која Мицкоски се вратил порано од европските земји е само поради лидерската средба.
-Веќе е соопштено дека претседателот на ВМРО-ДПМНЕ Христијан Мицкоски ја прекина посетата на Италија и со тоа и средбите со македонската дијаспора и се врати во Македонија заради акутното прашање поврзано со најавите од власта за премиерска средба Заев- Ципрас која беше најавена како клучна (финална) за надминување на разликите со Грција.
Истовремено ВМРО-ДПМНЕ побара итна лидерска средба со поголемите партии вклучително и Претседателот на државата, посветена токму на информирање за развојот и деталите од процесот, која што Зоран Заев ја одбива и продолжува со целосната нетранспарентност за развојот во процесот, што пак максимално поттикнува впечаток дека нешто се крие од очите на јавноста.
„Повторуваме дека Заев и оваа влада нема монопол за одлука врз прашање кое длабоко ги засега сите граѓани, и оние определените и оние кои се политички неопределени.“
Во таа насока, сонародниците ја разбраа сензитивноста на моментот и ова прекинување на посетата и одложувањето на средбите со претседателот на ВМРО-ДПМНЕ, Мицкоски, велат за А1он од партијата.
На својата агенда, лидерот на најголемата опозициска партија ги имаше швајцарските градови Локарно, Лозана и Цирих каде требаше да се формираат нови задгранични комитети, но Мицкоски не се сретна со нив и се врати во земјава.
Виктор Јованов