Европската унија активно ќе учествува во барањето на решение за кризата во Мали, изјави високиот претставник на ЕУ за надворешна политика и безбедност Кетрин Ештон, јави БТА.
– Го признавам значањето на тоа што во моментот го прави Франција, но е неопходно да ги зголемиме овие напори, со цел да се најде трајно решение, изјави Ештон пред средбата со министерот за надворешни работи на Перу.
Ештон не одговори директно на прашањето дали и други европски земји ќе испратат свои војници. Таа нагласи дека стратегијата ќе вклучува долгорочна поддршка за развој на земјата и дејствија кои ќе гарантираат дека оние што прибегнуваат кон тероризам ќе бидат истерани од таму каде моментално дејствуваат.
Франција минатата недела почна воена интервенција во северниот дел на западноафриканската земја. САД, Белгија, Велика Британија, Данска и Канада веќе помагаат со транспортни авиони на француската операција во регионот.