На пригоден начин гевгеличани денеска го одбележаа денот кога пред 75 години излегле првите партизани од градот и околината кои во рамки на формираните одреди се бореле за ослободување на земјата од фашистичкиот окупатор.
Делегации на боречката организација, локалната самоуправа на чело со градоначалникот Сашо Поцков, претставници на јавните институции, политичките партии, бизнис секторот и граѓански здруженија по тој повод им оддадоа почит на народните херои и паднатите борци од овој крај со положување цвеќе пред нивните спомен обележја.
За настаните од тоа време зборуваше членот на боречката организација, Јани Ташковски, кој истакна дека тогаш било договорено партизаните да излегуваат во групи поради безбедносни причини и дека токму на денешен ден првата група партизани излегла во потпланинското место Топлик.
– Подоцна етапно излегуваа и другите групи партизани од кои беше формиран одредот „Сава Михајлов“ преку кој се вклучија во НОБ. Затоа денешниот ден за историјата на Гевгелија е многу значаен и наша должност е да продолжиме да го чествуваме, рече Ташковски.