95-годишната Митра е тешко подвижна и има сериозни проблеми со бубрезите.
„Младите ни побегнаа во странство и ако не е грижата од општина Центар не знам како ќе се снајдам и ќе преживеам. Градоначалниче многу сум ви благодарна“, му порача баба Митра на градоначалникот Саша Богдановиќ кој денеска и го врачи Решението за нега во домашни услови.
Втора година таа е вклучена во проектот „Центар се грижи за возрасните“, исто како и 78-годишната Божана која е тешко подвижна со две операции на очи и вештачко рамо. Тешко подвижен е и нејзиниот сопруг Ефтим кој има 81 година.
„Да не беше негувателката Соња зимава немаше кој да ни купи леб и лекови“, вели баба Божана.
„Тие се наши родители на кои им должиме се во животот, тие не воспитуваа и негуваа и сега ние треба да им се оддолжиме. Наша задача е да се грижиме за возрасните во нашата општина“, вели градоначалникот Богдановиќ.
Возрасните лица во општина Центар и оваа година добиваат нега од сертифицирани негуватели. Проектот е збогатен и со помош од медицинска сестра и физиотерапевт. Со проектот се опфатени 90 лица, жители на Центар со возраст над 60 години.