Во периодот од 15 до 17:15 часот утре сообраќајот во централното градско подрачје во Скопје ќе биде пренасочен по одредени сообраќајници поради уличната акција организирана од здружението Млади европски федералисти на потегот од Собранието на Република Македонија до Скопско кале.
Како што соопшти МВР, трасата на движење на уличната акција е од пред Собранието и продолжува кон Порта Македонија, низ градскиот плоштад Македонија, Камениот мост, плоштадот „Филип 2“, по улицата „Иљо Војвода“, десно по надвозникот над булеварот „Гоце Делчев“, десно по улицата „Самуилова“ пред платото на црквата “Св. Спас“, лево по сервисната улица кон Скопско кале и потоа назад кон македонското Собрание по истата траса.
Акцијата е замислена како мирен марш низ центарот на градот преку која ќе се испрати порака за европското единство и поддршка за евроинтеграциските процеси на Македонија и државите од Западен Балкан.