Кина денеска ги предупреди САД дека е „подготвена и способна да ги заштити своите национални интереси” при евентуална трговска војна, јави ДПА.
Кинескиот вицепремиер Лиу Хи разговарал по телефон со американскиот министер за финансии Стивен Мнучин утрово информираше кинеската новинска агенција Синхуа.
Лиу изјави дека специјалната седуммесечна истрага што Вашингтон ја спроведува против кинеските трговски практики ги крши правилата на светската трговија.
– Кина е подготвена и способна да ги брани своите национални интереси и се надева дека двете страни ќе останат разумни, рече кинескиот вицепремиер.
САД, претходно оваа недела, најавија планови да наметнат давачки на широк спектар за кинески производи поради наводните прекршувања на режимот на интелектуалната сопственост и антиконкурентски практики од кинеска страна.
Пекинг вчера одговори со листа на американски увозни стоки, вклучувајќи свинско месо, јаболка и челични цевки, во вредност од три милијарди долари, кои можат да бидат оданочени, како контра-мерка.