Основното јавно обвинителство Битола донесе наредба за спроведување истражна постапка против тројца државјани на Албанија заради постоење основано сомнение дека како соизвршители сториле кривично дело – Неовластено производство и пуштање во промет наркотични дроги, психотропни супстанции и прекурсори од чл.215 ст. 1 од Кривичниот законик. На лицата им е одреден триесетдневен притвор.
Како што соопшти Основното јавно обвинителство, лицата се осомничени дека во Република Албанија неовластено набавиле околу 38 килограми наркотична дрога марихуана, ја внеле во Македонија, ја препакувале во 36 најлонски пакувања и во две торби со возило ја донеле до нелегален граничен премин кон Грција во близина на селото Лажец. Еден од осомничените останал во возилото да чека, додека другите двајца се обиделе дрогата пеш да ја пренесат во Грција заради продажба. Сите тројца биле затекнати во извршување на делото во близина црквата во селото Лажец.
– Ценејќи дека се исполнети сите законски основи, надлежен јавен обвинител предложи определување мерка притвор за осомничените, а судија на претходна постапка на сите тројца осомничени им одреди мерка притвор во траење од 30 дена.