За 31 отсто е намален бројот на регистрирани прекршувања на јавниот ред и мир во општина Виница во 2017 во однос на претходните години. Од 62 прекршоци, дури 23 биле со физички напад, а 17 завршиле со тепачка.
– Најголем дел од евидентираните сторители се над 25-годишна возраст, а невообичаено е што лани имавме дури 10 прекршоци на Законот за оружје, истакна командирот на Полициската станица – Виница, Љупчо Петров.
Во текот на 2017 година имало и најмногу протести, дури 25, од кои најголем дел биле организирани од граѓанската иницијатива „За Заедничка Македонија“.
Бројот на регистрирани сообраќајни несреќи на подрачјето на општината е намален за 11 отсто, но има пораст на бројот на жртви, а 22 сообраќајки завршиле со потешки телесни повреди. Од сообраќај биле исклучени 305 возила и 278 возачи, а заради управување на моторно возило под дејство на алкохол биле одземени само 6 возачки дозволи.
До Основниот суд во Виница лани се поднесени 271 барање за поведување прекршочна постапка, како и 15 кривични пријави поради загрозување на безбедноста на јавниот сообраќај.