Против членот на политичката партија Левица, Коста Карев, поднесена е кривична пријава, информираат од партијата и додаваат дека основа за кривичната било тоа што Карев фотографирал луѓе во автомобил пред избирачко место во Гевгелија.
„По кривичните постапки против нашите членови Здравко Савески и Мариглен Демири, сега и против Коста Карев е поведена кривична постапка. Тој е обвинет за злоупотреба на лични податоци по член 149, ст.1 од Кривичниот законик. Кое е неговото злосторство? Дека за време на локалните избори фотографирал луѓе што седеле во автомобил пред избирачкото место 0340 во Гевгелија со списоци во кои евидентирале кој бил да гласа, а кој не. Го сликал и полицаецот што го легитимирал и тоа го објавил на ’Фејсбук’. Поради ова „злосторство“, тој утре треба да се појави на суд!“, велат од партијата преку соопштение до медиумите.
Левицата додава дека Карев и партијата се бореле против злоупотребата на институциите од страна на претходната власт, па прашуваат дали ова го добиваат оние што не сакаат да се продадат и кои им останале верни на принципите.