„Државната комисија за спречување на корупцијата на денешната седница по своја иницијатива отвори неколку предмети за кои се објавуваа информации во јавните гласила, а за наводите кои беа изнесени во медиумите за изборот на обвинителите во Советот на јавни обвинители донесе заклучок да се отворат два предмети од областа на судир на интереси и да се пристапи кон прибирање на релевантна документација од институциите со цел утврдување на фактичката состојба, врз основа на кои ќе може да донесе конечен заклучок за постоење или непостоење судир на интереси“, објавија антикорупционерите.
Станува збор за текстовите во медиумите за изборот на обвинител на внуката на претседателот на Советот, Коле Штерјев, како и неизборот на обвинителката Лидија Раичевиќ во Обвинителството за организиран криминал и корупција. Коле Штерјев во соопштение за јавноста напиша дека одлуките во Советот се носат колективно преку поединечно гласање на секој член. Се повика на Правилник на Државната комисија за спречување корупција според кој тетин и внука не се сметаат за крвно сродство за тој да се изземе од гласање. За неизборот на обвинителката Раичевиќ, Штерјев ѝ соопшти на јавноста дека таа немала доволно бодови за да биде избрана во Обвинителството за организиран криминал и корупција. Првиот човек на Советот потврди за изборот на Раичевиќ гласала Фиданка Рајевска, сопруга на ексдиректор на банка, против кого Раичевиќ води истрага за перење пари и банкарски криминал.
В. М.