Владата на Грција почнува битка со цел до март да ја добие следната транша од меѓународната финансиска помош, пишува весникот „Етнос“.
Следната транша изнесува 9,2 милијарди евра, а одлуката за нејзиното доделување се очекува да биде донесена од Еврогрупата на 21 јануари.
Освен овие пари, додава весникот, кабинетот на премиерот Андонис Самарас се надева дека во февруари и март ќе ги добие преостанатите транши од помошта. До март Грција вкупно треба да добие уште 14,8 милијарди евра од меѓународната финансиска помош.
Траншата за јануари од 9,2 милијаерди евра е наменета за рекапитализација на банките, за што се одредени 7,2 милијарди евра и две милијарди за потребите на буџетот. Условот за доделување на овие средства беше грчкиот Парламент да го изгласа законот за даночни измени, што беше направено и Владата да ги зголеми цените на струјата, што исто така е сторено.
За траншата за февруари од 2,8 милијарди евра од кабинетот на Самарас се очекува да ги плафонира трошоците во државната администрација, а за парите во март во вредност од 2,8 милијарди евра се бара да се забрза решавањето на проблемите со намалувањето и преструктуирањето на државниот долг.