Го добивме извештајот на работната група при Министерстото за правда за проверка на системот АКМИС и испративме мислење до тоа Министерство, рече првиот човек на Судскиот совет, Зоран Караџовски.
Според Судскиот совет, дискутабилно е дали извештајот треба да има назнака строго доверливо.
„Ние сме во дилема дали извештајот треба да се води по таа класификација“, рече Караџовски.
Според него, на извештајот, кој бил испратен во советот од Министерството за правда, било ставено обично ливче на кое со пенкало било напишано „строго доверливо“.
Караџоски тврди дека членови на Судскиот совет немаат безбедносни сертификати за да го прочитаат извештајот. На новинарско прашање дали е точно дека одредени членови на Советот не може да добијат безбедносен сертификат, тој не можеше да даде конкретен одговор.
Караџовски притоа рече дека во извештајот нема конкретни примери со предмети и извештајот може да претставува само основа за подлабинска проверка.
На прашање на „Макфакс“ дали не е симптоматично за Судскиот совет што распоредот на судии во Врховниот суд за само една година бил менуван повеќе од 9 пати, Караџовски рече: „За распоредот на судии прашајте го Вангеловски“.
В.М.