Шпанија за првпат ќе биде домаќин на едно Светско првенство во ракомет. Оваа земја досега била организатор на светски спортски собири во фудбал, кошарка, атлетика, а еве за првпат и во ракомет. Мундијалот започнува денеска со натпреварот Шпанија – Алжир (19 часот) и ќе трае до 27 јануари за кога е закажано големото финале.
На ова натпреварување ќе настапат 24 репрезентации од петте конфедерации членки на ИХФ (Светската ракометна федерација). Покрај Шпанија како домаќин директно учество избори и Франција како светски првак.
На шампионатот пласман обезбедија трите првопласирани репрезентации од континетите: Африка (Тунис, Алжир, Египет); Европа (Данска, Србија, Хрватска); Азија (Јужна Кореја, Катар, Саудиска Арабија); Јужна , Средна и Северна Америка (Аргентина, Бразил, Чиле), како и од Океанија (Австралија).
Пласман изборија и уште 9 репрезентации од Европа, кои играа бараж дуели. На таков начин и Македонија се пласира на шампионатот.
Ова ќе биде трето учество на Македонија на Светските првенства откако претходно настапи 1999 година во Египет – 18.место и 2009 во Хрватска – 11.место.
Најмногу настапи на Светските првенства имаат ракометарите на Германија. За нив ова ќе биде 21.учество, додека Шведска по вторпат не успева да се пласира на ракометниот Мундијал, инаку и тие имаат 21 настап.
Токму Шведска на најуспешната селекција со 11 медали (4 златни- 3 сребрени – 4 бронзени), пред Франција со 8 (4-1-3), додека Романија која истотака нема да настапи има 6 (4-0-2). Вкупно 14 репрезентации имаат освоено медали.
Натпреварите ќе се одиграат во 6 градови во Шпанија. Барселона ќе биде домаќин на натпреварите од А групата, на осминафиналето, четвртфиналето, полуфиналето и натпреварите за пласман (финале + 3.место). Во Сарагоса ќе се играат натпреварите од Ц групата, осминафиналето и четвртфиналето. Севиља е домаќин на групата Б, каде ќе игра Македонија, додека Мадрид е домаќин на групата Д. Во Гранољерс ќе се играат првите четири кола од А групата. Гвадалахара ќе биде организатор на „Президент купот“ каде ќе се играат натпреварите за пласман од 17 до 24.место.
Најголема е салата во Барселона – „Палау Сант Жорди“ (капацитет – 16.500). Македонија натпреварите во Севиља ќе ги игра во „Паласио Мунисипал де Депортес Сан Пабло“ со капацитет од 9.500 седишта.
На шампионатот меѓу 16.те судиски двојки се наоѓа и македонската Ѓорѓи Начевски и Славе Николов.
Капитенот на македонската репрезентација Кирил Лазаров е најдобар стрелец во историјата на Светските првенства со 92 гола постигнати на шампионатот во Хрватска 2009 година.