Денеска градоначалникот на Општина Штип, Благој Бочварски, одржа средба со претставници и ученици од ООУ „Ванчо Прќе“ во Штип. На средбата се дискутираше за начините на коишто Општина Штип ќе обезбеди поддршка за унапредување на работата на основните и средните училишта.
Градоначалникот Бочварски истакна дека е особено важно да се гасифицираат училиштата, со цел да се заштеди енергија и да се подобрат условите за работа во нив. Со тоа ќе се овозможи повеќе средства да се инвестираат во образовните институции и во образовните процеси, што ќе придонесе за поголем квалитет во образованието, присуство и видливост на учениците од Штип на регионални, државни и меѓународни натпревари.
Градоначалникот на Општина Штип посочи и дека во буџетот на Општина Штип што се подготвува за 2018 година предвидено е повеќе средства да бидат наменети за меѓуучилишни спортски натпревари и игри, но и за благодарници и признанија за ученички и ученици кои ќе добиваат награди на натпревари од различни области. Со тоа Општина Штип ќе ги мотивира учениците, но и наставничкиот кадар да остваруваат с поголеми успеси.
Ученичките и учениците коишто присуствуваа на оваа средба од градоначалникот побараа повеќе места со забавни содржини во коишто тие би можеле да го поминуваат слободното време. Градоначалникот посочи дека планирана е изградба на аква-парк, затворен базен, а и дека се разгледуваат можностите за отворање кино сала. Така ќе порасне квалитетот на секојдневното живеење во Општина Штип, а најмладите ќе бидат задоволни и среќни што живеат во оваа Општина.
Градоначалникот Бочварски истакна дека нему особено му е важно во образовниот процес во сите образовни институции во општината да има целосна инклузија на сите ученици, но и да се отстранат пречките, стереотипизирањето и дискриминацијата, како и да се обезбеди рамноправност за сите учесници во образовниот процес.
На крајот од средбата беше потпишан Меморандум за соработка помеѓу градоначалникот на Општина Штип и ООУ „Ванчо Прќе“, со којшто се гарантира меѓусебната соработка и координација во креирањето и имплементацијата на проекти од заеднички интерес, а со цел унапредување на наставниот процес.